Najmanje četiri osobe poginule su, a deset je povrijeđeno u novom talasu ruskih napada na više dijelova Ukrajine tokom noći, saopštili su ukrajinski zvaničnici.
Najteže posljedice zabilježene su u pograničnoj Sumskoj oblasti, gdje je ruski dron pogodio porodičnu kuću. U napadu su život izgubile dvije žene, jedan stariji muškarac i djevojčica mlađa od dvije godine, dok su još tri osobe povrijeđene.
Načelnik regionalne vojne administracije Oleh Hrihorov saopštio je da su spasilačke ekipe tokom noći radile na mjestu udara.
Istovremeno je raketni napad pogodio i Krivi Rog, rodni grad ukrajinskog predsjednika Volodimira Zelenskog. Prema riječima načelnika gradskog Savjeta odbrane Oleksandra Vilkula, raketa je pala u gusto naseljeno područje, pri čemu je povrijeđeno sedam osoba.
Novi napadi uslijedili su samo dan nakon jednog od najsmrtonosnijih ruskih udara na Kijev ove godine. U četvrtak je u glavnom gradu Ukrajine poginulo najmanje 36 ljudi, zbog čega će danas biti proglašen Dan žalosti.
Rusija posljednjih sedmica intenzivira vazdušne napade na ukrajinske gradove, dok se borbe na frontu i dalje nastavljaju bez naznaka skorog smirivanja sukoba.
